ទិដ្ឋភាពទូទៅ
សមុទ្រឈើ ភ្នំបាយឆៅ បានក្លាយទៅជារមណីយដ្ឋានដែលមិនអាចខ្វះបាន ចំពោះភ្ញៀវទេសចរទាំងឡាយដែលបានទៅដល់ទឹកដីនៃខេត្តមណ្ឌលគិរី ហើយមិនអាចមើលរំលងទីនោះបានឡើយ ។ នៅលើកំពូលភ្នំដ៏ខ្ពស់ភ្ញៀវទេសចរទាំងឡាយបាននាំគ្នាទៅឈរពីលើកំពូលភ្នំសម្លឹងចុះមកក្រោមឃើញទេសភាពធម្មជាតិព្រៃភ្នំដាច់កន្ទុយភ្នែក គួរឱ្យចង់គយគន់ក្រៃលែង ភ្ញៀវខ្លះបានត្រេកត្រអាលជាមួយនឹងការថតរូបទេសភាពដ៏ស្រស់បំព្រងគ្មានពីរនៅទីនោះ។បច្នុប្បន្ន ភ្នំបាយឆៅ នោះគេតែងតែសង្កេតឃើញមានអ្នកដំណើរ និងភ្ញៀវទេសចរឈប់ចតរថយន្ត ដើម្បីថតរូបទេសភាពដែលចេញពីធម្មជាតិដ៏ស្រស់ត្រកាល ដែលគេអាចមើលឃើញនូវព្រៃភ្នំដ៏ខៀវស្រងាត់គ្រប់រដូវកាល ដែលធ្វើឱ្យអ្នកដែលបានទៅដល់ម្តងហើយ នឹងចង់ទៅម្តងទៀត។សម្រាប់ការធ្វើដំណើរដើម្បីទៅដល់ទីតាំងនៃរមណីយដ្ឋានសមុទ្រឈើ ភ្នំបាយឆៅ ភ្ញៀវទេសចរមានភាពងាយស្រួល ពីព្រោះមិនមានការធ្វើដំណើរថ្មើរជើង និងធ្វើដំណើរឆ្លងទឹក រឺក៏ជិះទូកឡើយ។ ចំពោះចំណតរថយន្តវិញ ភ្ញៀវទេសចរអាចធ្វើការចតដោយផ្ទាល់នៅរមណីយដ្ឋានបានថែមទៀតផង។សម្រាប់កន្លែងអង្គុយលំហែរកាយវិញ រមណីយដ្ឋានសមុទ្រឈើ ភ្នំបាយឆៅ គឺមានខ្យូសអង្គុយ រឺក៏តូបអង្គុយជាច្រើនសម្រាប់ភ្ញៀវទេសចរ ហើយក៏មានសេវាកម្មទទួលកម្មង់អាហារផ្ទាល់ពីទីនោះផងដែរ។ ក្រៅពីនេះ រមណីយដ្ឋានសមុទ្រឈើ ភ្នំបាយឆៅមានកន្លែងកម្មង់អាហារ រឺកន្លែងលក់អាហារ ហើយក៏មានភោជនីយដ្ឋានផងដែរ ប៉ុន្តែសម្រាប់អាហារដ្ឋានពុំទាន់មាននៅឡើយទេ។សម្រាប់កន្លែងស្នាក់នៅ រមណីយដ្ឋានសមុទ្រឈើ ភ្នំបាយឆៅពុំទាន់មានបឹងហ្គាឡូ, ផ្ទះសំណាក់ និងសណ្ឋាគារនៅឡើយទេ។
