ទិដ្ឋភាពទូទៅ
រមណីយដ្ឋានភ្នំព្រះរាជទ្រព្យ(ភ្នំឧត្តុង្គ ) (ភ្នំអដ្ឋរស្ស) ជាអតីតរាជធានីនាសតវត្សរ៍ទី ១៧ ចាប់ពីឆ្នាំ ១៦១៨ ដល់ឆ្នាំ ១៨៦៦ ហើយត្រូវបានប្តូររាជធានីទៅកាន់រាជធានីភ្នំពេញដោយព្រះបាទនរោត្តម នៅឆ្នាំ ១៨៦៦។ ភ្នំនេះជាទីកន្លែងសម្រាប់បញ្ចុះសពនៃព្រះរាជវង្សានុវង្ស និងជាកន្លែងដែលព្រះរាជាទ្រង់ព្រះរាជានុញ្ញាតអោយសាងសង់វត្ត និងព្រះវិហារ។ ការដែលគេហៅ “ភ្នំព្រះរាជទ្រព្យ” ដោយសារព្រះមហាក្សត្រជំនាន់នោះយល់ថាភ្នំនេះមិនខ្ពស់ពេក ហើយស្ថិតនៅក្បែរឧត្តុង្គ ដែលជារាជវាំងស្រាប់ ព្រះរាជាក៏ទ្រង់ចាត់អោយសាងព្រះចេតិយធំៗ និងមានចម្លាក់លម្អសម្រាប់បញ្ចុះព្រះបរមអដ្ឋិ និងព្រះអដ្ឋិនៃព្រះរាជវង្សនុវង្សដោយចាប់សាងបូជនីយស្ថាននោះ ដោយកម្លាំងព្រះរាជទ្រព្យផ្ទាល់ព្រះអង្គទើបសន្មតថា “ភ្នំព្រះរាជទ្រព្យ”។ ភ្នំព្រះរាជទ្រព្យ ឬភ្នំឧត្តុង្គ ជារមណីយដ្ឋានទេសចរណ៍បែបប្រវត្តិសាស្ត្រមួយ ដែលភ្ញៀវទេសចរអាចសិក្សាស្វែងយល់ពីប្រវត្តិសាស្ត្រកម្ពុជា ព្រោះទីនោះធ្លាប់ជារាជវាំងចាស់អំឡុងឆ្នាំ ១៦១៨ និង១៨៦៦។
