ដោយប្រជាជន ដើម្បីប្រជាជន
រមណីយដ្ឋានបឹងលំកុដ ឬអ្នកស្រុកហៅបឹងគិរីវង្គត់ គឺជាការហៅភ្ជាប់ជាមួយនឹងឈ្មោះរបស់ទីអារាមមួយនៅក្បែរនោះមានឈ្មោះថា «វត្តគិរីវង្គត» មានទឹកថ្លាឆ្វង់ ពណ៌ខៀវដូចទឹកសមុទ្រមានផ្ទៃបឹងធំទូលាយអមដោយព្រៃតូចធំ ស្ងាត់ជ្រងំ សម្រាប់ក្រុមទេសចរដែលចូលចិត្តទីស្ងាត់អាចចុះហែលទឹកលេងកម្សាន្តយ៉ាងត្រជាក់កាយ និងអាចស្ទូចត្រីកម្សាន្តបានផងដែរ។
រមណីយដ្ឋានបឹងលំកុដ មានទីតាំងនៅភូមិសមុទ្រ (សមុត) ក្រោម ឃុំសេដា ស្រុកលំផាត់ ខេត្តរតនគិរី ដោយមានចម្ងាយជាង ៦០ គីឡូម៉ែត្រពីក្រុងបានលុង ឬចេញពីផ្លូវកែងនៃប៉ុស្តិ៍ប៉េអឹមលើដងផ្លូវឆ្ពោះទៅកាន់ផ្សារបកែវ ចម្ងាយ ១៤ គីឡូម៉ែត្រ និងចូលតាមក្លោងទ្វាវត្តគិរីវង្គត់ចម្ងាយប្រមាណ ១-២ គីឡូម៉ែត្រ។ រមណីយដ្ឋានបឹងលំកុដ ដែលលាតសន្ធឹងល្វឹងល្វើយក្នុងទំហំក្រឡាផ្ទៃ ១១០ ហិកតា។
