ទិដ្ឋភាពទូទៅ
វាល ថ្មរំផ្លង់ ជារមណីយដ្ឋានអេកូទេសចរណ៍គួរឱ្យទាក់ទាញមួយ ជាដែនដីប្រពៃណីនៃសហគមន៍កុលសម្ព័ន្ធភ្នំរស់នៅទីនោះ។ នៅលើវាលនោះមានស្មៅ និងមានរុក្ខជាតិព្រៃដែលមានផ្ការីកស្គុសស្គាយនារដូវវស្សា ចាប់ពីខែឧសភា ដល់ខែមករា ។ នៅក្បែរនោះមានអូរតូចមួយមានទឹកថ្លាឈ្វេងជានិច្ច និងជួនកាលហូរផង ហើយបានជាដាក់ឈ្មោះថា «វាលថ្មរំផ្លង់» ដោយយកតាមឈ្មោះកូនមេកន្ទ្រាញកុលសម្ព័ន្ធភ្នំ ដែលរស់នៅជុំវិញតំបន់នោះ។ យោងទៅតាមរឿងព្រេង គឺជាយូរលង់មកហើយ វាលថ្មរំផ្លង់ជាវាលថ្មដាធម្មជាតិ ដែលពួកកុមារជនជាតិដើមភាគតិចនិយមទៅលេងរួមទាំងកូនមេកុលស ម្ព័ន្ធក្នុងតំបន់ និងនិយមទៅបង្ហោះខ្លែងលេងផងដែរ ។ វាលរំផ្លង់ ជាទីធ្លាវប្បធម៌ ធម្មជាតិនៅកណ្តាលព្រៃរបស់បងប្អូនជនជាតិភាគតិចជាច្រើនដែលរស់នៅក្នុងខេត្ត រតនគិរី។ វាលរំផ្លង់ ក្នុងឃុំអូរជុំ ស្រុកអូរជុំ ខេត្តរតនគីរី អ្នកទេសចរដែលនិយមទៅ ទស្សនាវាលរំផ្លង់ និងព្រៃឈើធម្មជាតិ នៅទីនោះ ពួកគេតែងតែយកទៅជាមួយនូវអាហារពិកនីកសម្រាប់បរិភោគនៅទីនោះ ពីព្រោះនៅតំបន់កុលសម្ព័ន្ធនេះមិនមានផ្សារលក់ដូរចំណីអាហារឡើយក្រៅ អំពីភូមិជនជាតិដែលតាំងនៅលើតំបន់ខ្ពង់ រាបប្រកបដោយភាពសុខដុមនោះ។ ការធ្វើដំណើរទៅកាន់វាលរំផ្លង់គឺចាំបាច់គេត្រូវចាកចេញពីក្រុងបាលុងតាមផ្លូវខេត្តឆ្ពោះទៅស្រុកអូរជុំប្រមាណជាង១០គីឡូម៉ែត្រដល់ផ្លូវបំបែកជាបួន រួចបត់ស្តាំបន្តដំណើរតាមផ្លូវទៅស្រុកតាវែងប្រហែល៤គីឡូម៉ែត្រទៀតនោះ យើងនឹងបានទៅដល់វាលរំផ្លង់ដែលមានសណ្ឋានផ្ទៃថ្មរាបស្មើ ដែលមានព្រៃឈើធម្មជាតិតូចធំដុះព័ទ្ធជុំវិញចោល ម្លប់យ៉ាងត្រជាក់។
